ﻣﺮﺣﺒﺎً ﺑﻤﺤﺘﺮﻓﻲ ﺍﻟﻜﺮﺍﻓﺘﻴﻨﻎ!
من بعد ما صاوبت خط عربي لماينكرافت وبدّلت اللوغو ديالها بلوغو عربي، جا الدور على أكبر جزء من المشروع: ترجمة اللعبة للدارجة المغربية.
هادي هي النسخة الأولى v0.1 من الترجمة، وهي Resource Pack كيضيف الدارجة كلغة قابلة للاختيار من إعدادات اللعبة. الترجمة كتشمل القوائم، أسماء الأدوات والبلوكات، الإنجازات، رسائل الموت، وجزء كبير من النصوص الموجودة فاللعبة.
النسخة قابلة للعب من دابا، ولكن مازال كنراجع الكلمات داخل اللعبة وكنصلح الترجمة اللي ما جاتش مناسبة للسياق. بمعنى آخر، هادي بداية المشروع، ماشي النسخة النهائية ديالو.
شنو كيتبدّل بهاد الترجمة؟
الترجمة ماشي غير تبديل مباشر للكلمات، حيث حاولت نختار المصطلحات حسب السياق ديالها داخل اللعبة، وبكلمات تكون مفهومة وطبيعية فالدارجة.
هاد الترجمة كتشمل مثلاً:
- القوائم: بحال «لعب بوحدك» و«لعب مع الجماعة».
- أسماء الأدوات والبلوكات: بحال «دلاح»، «سطل»، وأسماء أخرى بالدارجة.
- رسائل الموت: الرسائل اللي كتبان ملي كيموت اللاعب.
- الإنجازات والنصوص الأخرى: جزء كبير من النصوص الموجودة داخل اللعبة.
وهاك شي أمثلة باش تشوف كيفاش كيطلع داكشي:
علاش الدارجة بالضبط؟
الهدف من هاد المشروع هو نشوف الدارجة حاضرة داخل لعبة كبرنا معاها، ونخلي Minecraft مفهومة أكثر للناس اللي مرتاحين مع الدارجة أكثر من الإنجليزية أو الفرنسية.
ولكن الدارجة ماشي موحّدة بشكل كامل، ونفس الحاجة ممكن يكون عندها أكثر من اسم حسب المدينة أو المنطقة. لهذا هاد النسخة v0.1 ماشي ترجمة نهائية، وإنما أول نسخة قابلة للتجربة. غادي نبقى نراجع الكلمات داخل اللعبة، وأي ملاحظة أو اقتراح من اللاعبين يقدر يعاونني نحسّن الإصدارات الجاية.
قبل ما تركّب الترجمة
باش العربية تبان بشكل واضح داخل اللعبة، من الأفضل تركّب الخط العربي اللي صاوبت لماينكرافت:
- الخط العربي: كيخلي الحروف أوضح ومقروءة داخل القوائم والنصوص.
- اللوغو العربي: إضافة اختيارية كتبدّل شعار Minecraft بلوغو مكتوب بالعربية.
الخط مهم لعرض الكتبة مزيان، أما اللوغو فاختياري وما كيأثرش على الترجمة نفسها.
تقدر تستعمل الترجمة بوحدها، ولكن مع الخط واللوغو كتولي الواجهة منسجمة أكثر مع باقي المشروع.
تحميل ماينكرافت بالدارجة
رفعت النسخة v0.1 على Modrinth باش يكون التحميل مباشر وساهل. هادي أول نسخة قابلة للتجربة، ومازال غادي نبقى نراجعها ونحسّنها مع الوقت.
تحميل الترجمة من Modrinth
طريقة التركيب
- حمّل الملف بصيغة
.zipوخليه كيف ما هو، ما تفكوش. - حل اللعبة وسير لـ
Options > Resource Packs > Open Pack Folder. - حط ملف الـ
.zipداخل المجلد. - رجع للعبة وفعّل الباك، ومن بعد كليكي على
Done. - سير لـ
Options > Languageواختار الدارجة المغربية (المغرب).
دابا غادي تبان الدارجة ضمن اللغات المتوفرة فاللعبة.
شنو جاي فالإصدارات الجاية ؟
هادي هي النسخة v0.1، وفيها ترجمة شاملة لملفات اللعبة، بما فيها الإنجازات. ولكن حيث النصوص كثيرة، مازال كنراجع الترجمة داخل اللعبة وكنصلح الكلمات اللي ما جاتش مناسبة للسياق.
الخطة ديالي دابا هي:
- المراجعة داخل اللعبة: نلعب بالترجمة ونشوف كيفاش كيبان كل مصطلح فالسياق ديالو. تحسين الكلمات والمصطلحات: نعتمد الملاحظات والاقتراحات اللي كيوصلوني. ترجمة بعض المودات: ممكن نبدأ بمودات مشهورة بحال JEI وWaystones من بعد ما تستقر الترجمة الأساسية.
كلمة أخيرة
ملاحظة: هادي هي النسخة v0.1، وماشي ترجمة نهائية. الدارجة كتختلف من منطقة لمنطقة، ونفس الحاجة ممكن يكون عندها أكثر من اسم. إلا لقيتي شي كلمة ما جاتش مناسبة، ولا عندك اقتراح أحسن، تقدر تواصل معايا باش نراجعو فالإصدارات الجاية.
بصحة!
