ﺗﺤﻴﺔ ﺧﺎﺻﺔ ﻟﻠﻨﺎﺱ ﺍﻟﻠﻲ ﺳﻬﺮﺍﻧﺔ ﻛﺘﻔﺎﺭﻣﻲ!
من بعد ما ركزت فالـDevlogs اللي فاتو على القتال والحركة، جا الوقت باش نخدم على واحد الحاجة اللي كتفرق بزاف بين Prototype ولعبة مريحة فاللعب: الـGame Polish.
فهاد التحديث ركزت على الإحساس العام ديال اللعبة، ماشي غير على إضافة محتوى جديد. زدت دعم المانيطة، حسّنت الواجهة، صاوبت كيبورد افتراضي بالدارجة، خففت وقت التحميل، وزدت أصوات ولوحة إعدادات.
هاد التغييرات ما كيبانوش بحال إضافة عدو جديد ولا سلاح، ولكن هما اللي كيخليو اللعبة تولي أسهل وأمتع فالتجربة.
شاشة البدية جديدة
الإصدارات الأولى كانت كتدخل مباشرة للعبة بلا شاشة بداية واضحة.
قررت نزيد شاشة بسيطة فالليل، فيها الشخصية حْدَ النار، مع عنوان اللعبة وزر البداية والإعدادات.
زدت Fire Particles وسط العافية، وخليت الكاميرا تحرّك شوية باش الشاشة ما تبقاش جامدة.
الهدف ما كانش ندير مشهد كبير، ولكن نعطي اللاعب لحظة قصيرة قبل ما يدخل للعالم، ويكون الانتقال للعبة أهدأ وأكثر وضوح.
اللعب بالمانيطة
ألعاب الـAction RPG كيتلعبو مزيان بالمانيطة، لذلك زدت دعم الـController بدل ما تبقى التجربة مربوطة غير بالكيبورد.
استعملت البوطونات بهاد الشكل:
Left Joystick: لتحريك الشخصية بحرية.
A: للتفاعل مع الشخصيات والحوايج القريبة.
X: للهجوم بالسيف.
Y: للانخفاض أو الزحف.
بعض الأزرار كتبدل الوظيفة ديالها على حساب السياق. مثلاً، ملي كتقرب من NPC كيبان زر التفاعل مع النص المناسب، بدل ما يبقى اللاعب كيجرب الأزرار بوحدو.
زدت حتى Interaction UI صغيرة كتبيّن الزر المطلوب، سواء كنت كتستعمل المانيطة أو الكيبورد.
الكيبورد الافتراضي بالدارجة
ملي زدت اللعب بالمانيطة، بان ليا مشكل آخر: كيفاش اللاعب يكتب شي جواب أو اسم بلا ما يحط المانيطة ويقلب على الكيبورد؟
الحل كان هو نصاوب Virtual Keyboard داخل اللعبة.
الكيبورد فيه الحروف العربية كاملة، واللاعب يقدر يختار الحروف بالمانيطة ويكتب مباشرة داخل الواجهة.
هادشي زاد مستوى آخر من الدعم للدارجة، لأن اللغة ما بقاتش غير فالنصوص والقوائم، ولكن ولات حتى فطريقة التفاعل نفسها.
هاد الجزء مازال قابل للتحسين، خصوصاً فالتنقل بين الحروف وسرعة الكتابة، ولكن النسخة الحالية خدامة وكتبيّن الفكرة.
تحسين وقت التحميل
فالإصدارات القديمة، اللعبة كانت كتوقف شوية فشاشة التحميل، وهاد المشكل كان باين أكثر فنسخة المتصفح.
السبب هو أن بعض المؤثرات والـShaders كانو كيتحضرو أول مرة ملي كيبان المشهد، وهادشي كان كيخلي اللعبة تتقااال فالبدْيَة.
جربت ندير Pre-warming لبعض المؤثرات، ونحمّل أجزاء من المشهد قبل ما يدخل اللاعب للعبة.
النتيجة هي أن الدخول ولى أخف، وخصوصاً فنسخة الويب.
مازال كاين فرق بين نسخة Desktop ونسخة المتصفح، ولكن دابا الانتظار نقص والتجربة ولات أحسن من قبل.
تفاعل أكثر مع العالم
فـDevlog #3 كنت ركّزت على الحوارات والكاميرا، وفهاد التحديث زدت شوية ديال التفاعل مع البيئة.
الشجيرات القابلة للتكسير
زدت شجيرات فالطريق يقدر اللاعب يضربهم بالسيف باش يتقطعو.
استعملت نفس فكرة الـHealth System اللي كنت خدام بها مع الأعداء، ولكن طبقتها على عناصر من البيئة.
هادشي بسيط، ولكن كيعطي إحساس أن العالم ماشي غير ديكور ثابت.
المؤثرات الصوتية
زدت أصوات للتفاعل مع الشخصيات، الضرب، وبعض عناصر الواجهة.
الصوت كيبدل الإحساس ديال اللعبة أكثر من اللي كنت متوقع. حتى حركة بسيطة كتبان أحسن ملي كيكون عندها صوت مناسب.
لوحة الإعدادات
زدت لوحة إعدادات يقدر اللاعب يفتحها م بزر Tab ولا select فالمانيطة.
من خلالها يقدر يتحكم فـ:
- الصوت العام.
- الموسيقى.
- المؤثرات الصوتية.
- وضع Fullscreen.
- جودة بعض المؤثرات.
زدت حتى نظام Save Config باش اختيارات اللاعب تبقى محفوظة ملي يسد اللعبة ويرجع يفتحها.
الواجهة مازال بسيطة، ولكن دابا اللاعب يقدر يتحكم فالتجربة ديالو بلا ما يبدل أي حاجة من برا اللعبة.
جرب اللعبة
النسخة الحالية مازال Prototype، ولكن تقدر تجربها مباشرة فالمتصفح.
الخاتمة
هاد التحديث ما زادش عالماً جديداً ولا Boss كبيراً، ولكن حسّن بزاف الطريقة اللي كتتحس بها اللعبة.
الـGame Polish ماشي غير زواق، بل مجموعة ديال التفاصيل الصغيرة اللي كتخلي اللاعب يفهم شنو يدير، ويتحكم براحة، وما يبقاش كيحارب مع الواجهة أو وقت التحميل.
مازال عندي بزاف ديال الحوايج اللي خاصها تتحسن، ولكن هاد النسخة قربات المشروع شوية من لعبة قابلة للعب، ماشي غير تجربة تقنية.
تهلاو!
