ﺻﺎﻓﺎ ﻋﻠﻴﻜﻢ؟ ﻧﺘﻤﻨﻰ ﺗﻜﻮﻧﻮ ﺳﺎﻧﻚ ﺳﺎﻧﻚ!
أول مرة عرفت DOFUS كانت تقريباً فـ 2007، ملي كنت مازال مراهق.
كنت كندخل نلعب من وقت لوقت، ولكن بصراحة كنت ديما noob. ما كنتش فاهم مزيان المهام، المعدات، المهن، ولا حتى فين خاصني نمشي. كنت غير كندور فالعالم، نضرب شي وحوش، ومن بعد نحبس.
وزيد عليها، الاشتراك فداك الوقت ما كانش ساهل بالنسبة ليا. ما كانتش عندي طريقة بسيطة باش نخلص، وكنت مراهق أصلاً ههه, والمحتوى المجاني كان محدود، لذلك من بعد مدة خليت اللعبة.
دابا وأنا كنخدم على اللعبة ديالي، بديت كنفكر نحوّلها للـ multiplayer، ويمكن حتى ندير منها MMO صغيرة.
أول تجربة multiplayer فاللعبة ديالي: جوج clients داخلين لنفس العالم.
ومن تما تفكرت بعض ألعاب الـ MMO القديمة اللي سبق ليا جربت، بحال DOFUS وFinal Fantasy XI Online وEverQuest.
قلت: علاش ما نرجعش نجربهم دابا بعقلية مختلفة؟ ماشي غير كلاعب باغي يدوز الوقت، ولكن حتى كمطور باغي يفهم كيفاش خدامين ألعاب الـ MMO، وشنو اللي كيخلي الناس يبقاو متعلقين بهاد العوالم كل هاد السنين.
مرة كنكون كنلعب، ومرة كنوقف غير باش نشوف كيفاش اللعبة كتعلّم اللاعب حاجة جديدة، وكيفاش كتنظم المهام، وكيفاش كتشجعك تكمّل. هاد الملاحظات غادي تنفعني بزاف فاللعبة اللي كنخدم عليها.
وقررت نبدأ بـ DOFUS هي اللّولة. ومن بعد يمكن نجرب Final Fantasy XIV Online، حيث بانت ليا لعبة ناضية تا هي.
وهكذا رجعت لـ DOFUS، ولكن هاد المرة غيير بشوية عليا.
بديت بشخصية Féca بنت سمّيتها Law-V فسِيرفر Rafal.
ما بغيتش ندخل بعقلية السباق، ولا نحاول نوصل لأعلى مستوى بزربة. كنعرف أن ألعاب الـ MMO تقدر تاكل بزاااف ديال الوقت، وهادشي ما بغيتوش يوقع ليا.
الخطة ديالي بسيطة: نكمل المحتوى المجاني على راحتي، ومن بعد نشوف. يمكن نشترك غير أسبوع واحد كل شهر ولا شهرين، ونكمل الرحلة بشوية وبلا ما تولي اللعبة التزام.
ومن أول الساعات، بان ليا أن DOFUS تبدلات بزاف على اللي كنت عاقل عليها. الواجهة، البداية، وحتى المحتوى المجاني ولى أكبر من اللي كنت متصور. ولكن هادشي غادي نهضر عليه بالتفصيل فتدوينة جاية.
فالأول كنت ضايع شوية، وكنت باقي كنحاول نفهم القتال، التعويذات، نقاط الحركة ونقاط العمل.
حتى الحوايج اللي كنت كنظن غادي نتفكرهم، لقيت راسي خاصني نتعلمهم من جديد. ولكن هاد الإحساس ديال البداية كان ممتع أكثر من اللي كنت متوقع.
مرات كنت كنكمل شي مهمة بسهولة، ومرات كنت كنبقى كنقلب على شنو خاصني ندير. ولكن هاد المرة ما كنتش مستعجل. كنت كنقرا، نجرب، ونحاول نفهم اللعبة أكثر من المرة الأولى.
أول هدف حقيقي درتو كان هو نجمع اللبسة ديال واحد الفرخ سميتو الـPiou الأزرق.
راه غير لبسة عبيطة ديال البدية، ولكن أنا فرحت بها بزاف. كل مرة كنت كنلقى شي طرَيْف جديد، كنت كنلبسو ونشوف Law-V كتبدل شوية بشوية.
ملي كملت اللبسة كاملة، حسّيت أنني أخيراً بديت الرحلة ديالي بصح.
يمكن بالنسبة للاعب قديم لبسة ديال الـPiou ما تسْوا والو، ولكن بالنسبة لواحد noob بحالي، كانت أول إنجاز صغير وخلاتني نبغي نكمل ونشوف شنو كاين من بعد.
هادي غير البدْية.
واش زعما نقدر نجمع دوك البيضات ديال التنين اللي كنت غير كنسمع بيهم فـ 2007؟
إن شاء الله نشوف, تهلاو!
