ﻳﺎﻟﻠﻪ ﻧﺮﺩّﻭ ﺍﻟﻠﻌﺒﺔ ﻧﺎﺿﻴﺔ!
فالمقال اللي فات، خرجت من Astrub، بديت نكتاشف العالم الكبير، ووصلت تقريباً للمستوى 45. ولكن كان باقي عندي واحد الحساب مع واحد العافية “Feu Prophétique” اللي وقّفني فـPandala وخلاني نمشي فحالي.
من بعد ما خرجت من Pandala، كملت كنمشي مع المهام حتى لقيت راسي فـ جزيرة الأرانب Wabbit ولا نسمّيها جزيرة الأوَانب هههه. ومن اللّول بدات كاتبان ليا تلميحات على واحد الـ Dofus حقيقي… Dofus Cawotte.
قلت: مزيان، لقينا الهدف الجاي.
غير قبل ما نوصل ليه، كان باقي خاصني ندور نص العالم 😂.
DofusPlanet ولى عندي بحال البوصلة
مع كثرة المهام، وليت كنضِيع شوية وسط الـ Journal وما بقيتش عارف شنو تابع لشنو.
هنا بديت نستعمل DofusPlanet كثر، خصوصاً الـ checklist ديال المهام. كنشوف شنو كمّلت، شنو باقي، وشنو نقدر ندير من بعد باش نبقى تابع الطريق بلا ما نتروّن.
وبهاد الطريقة بقيت كندور فالعالم كامل تقريباً: Amakna، Sufokia، Cania، Sidimote، Frigost ومناطق خرى، وكل سلسلة كانت كتفتح ليا بلاصة جديدة.
حتى عند Otomaï وصلت تقريباً بهاد الطريقة.
ووسط هاد الدوران، بديت نلقى شخصيات ما كتنساش بسهولة.
Dark Vlad… هاد السيد ما باينش فيه الخير
وسط واحد السلسلة ديال المهام، وصلت عند واحد الـ Iop سميتو Dark Vlad.
راكب فوق واحد المخلوق، لابس كحل، ومن أول حوار معاه بدا كيهدّدني.
أيّه، باين عليك ولد الناس.
كنت جاي نسولو على شي معلومات مرتبطة بالـ Dofus نيت، ولكن بدا يصَيفط عليا الأتباع ديالو ندّابز معاهم.
ما كنتش عارف القصة ديالو كاملة، ولكن من الشكل والطريقة اللي كيهضر بها، كان واضح أن هاد الشخصية مهمة وأنني غالباً غادي نرجع نتلاقاه من بعد.
وليت دايز من Donjon لـ Donjon
مع هاد الـ Quêtes كاملين، لقيت راسي كندوز من Donjon لآخر بلا ما نخطط ليهم.
دزت من عند الـ Bworks وكملت شوية ديال المهام ديالهم، ودرت Bworkette، ومن بعد وصلت حتى لـ Akadémie des Gobs.
والبوس ديالهم سميتو Directeur Grunob.
يعني حتى الـ Goblins عندهم مدير المؤسسة 😂.
ودزت حتى من Forgerons، Larves، Batofu، Scarafeuilles ودونجونات آخرين. ما غاديش نبقى نعددهم كاملين، ولكن تقريباً كل واحد كان فيه شي حاجة كتبقى فالبال.
مثلاً من Donjon ديال المقبرة خرجت بـ Invocation de Chaferfu.
فرحت حيث قلت أخيراً عندي skeleton نقدر نصيفطو يتضارب معايا…
حتى اكتشفت أن السيد مرات كيقرر يضربني أنا 😭.
وكاين حتى Kwakwa اللي درتو جوج مرات، ماشي حيث عجبني بزاف…
نسيت نتعلم الـ spell اللي كنت محتاج باش ندير Capture d’âmes.
رجعت عاودت الـ Donjon من جديد وتعلمتو.
Gelano كان غالي… قلت نصايبو
وسط هاد التقدم، بديت نقلب حتى على معدات حسن، وشفت واحد الخاتم اللي كيبان فبزاف ديال الـ builds:
Gelano.
مشيت نشوف الثمن ديالو…
لا شكراً 😂.
عوض ما نشريه، قلت نصايبو بيدي.
وهنا وليت كنركز أكثر على Bijoutier، طلعت المهنة وبديت نفارمي الـ Gelées ونجمع الـ drops اللي خاصني.
خدات مني شوية ديال الخدمة، ولكن فالآخر تجمعت كلشي…
وصايبت Gelano ديالي بيدي.
هادي القضية عجباتني كثر من إلا كنت غير شريتو. كنت شفت Item باغيه، طلّعت خدمة على قبلو، جمعت المواد، وفاللّخير صنعتو.
هاد الخاتم خدم عليه مولاه.
حتى Lumino تعلمت كيفاش نخدم بيه
فالأول كنت كنشوفو غير شخصية زايدة كتدخل معايا للقتال وتزيد شوية فالـ dégâts.
ولكن من بعد فهمت بلي الـ healing ديالو هو اللي نافعني أكثر.
فبزاف ديال القتالات العاديين، أنا ننقص الضرر بالـ shields وهو يرجع ليا الدم، وهادشي سهل عليا بزاف ديال الحوايج اللي كنت كندير بوحدي.
رجعت لـ Feu Prophétique
فهاد الوقت كنت جمعت Panoplie Kwak Eau كاملة، شي قطع طاحو ليا وشي وحدين شريتهم، ومعايا Piou Bleu وGelano ديالي.
قلت دابا نجرب نشوف داك Feu Prophétique اللي حبّسني فالمقال اللي فات.
واش هاد المرة جلست وفهمت كل mechanic مزيان؟ لا.
واش درت stratégie عبقرية؟ حتى هي لا.
دخلت عليه بالقوة. BRUUTE FORCE 💥👊 💢
المرة اللّولة، المستوى والمعدات ديالي ما كانوش كافيين.
دابا رجعت بـ stats حسن، دم كثر، وshields أقوى.
هاد المرة ما كانش عندي شي plan عبقري ولا تكتيك خارق.
دخلت، ضربت، تحملت الضرر… وبقيت واقف حتى طاح.
وداز.
ما كانش انتصار تكتيكي تاريخي… ولكن واحد الحساب قديم تسد. 😌
فهمت شنو كيعني serveur multi-compte
وسط هاد الرحلة بديت نفهم واحد الحاجة اللي ما كنتش واخد بالي منها فالبداية: أنا كنلعب فـ serveur multi-compte.
كنت كنشوف Groupe فيه ثلاثة ولا أربعة ديال الشخصيات ونحسبهم ثلاثة ولا أربعة ديال اللاعبين.
ومن بعد فهمت…
راه غالبا تايكون بنادم واحد.
بزاف ديال الناس دايرين squad كامل بوحدهم، وبالتالي ما محتاجينش بزاف يقلبو على لاعبين آخرين باش يدوزو شي Donjon ولا Quest.
وأنا كنت غالباً غير Law-V وLumino.
فمعظم الوقت دبرت راسي، خصوصاً منين وليت كنستعمل Lumino كـ healer. ولكن ملي كتحتاج Quest لاعبين حقيقيين، هنا كتبان المشكلة.
فكرت واش ما كانش أحسن لو كنت بديت من اللول فـ serveur mono-compte…
ولكن كنت وصلت بعيد بزاف باش نلوح كلشي ونرجع للزّيرو.
قلت نكمل وصافي.
ورجعت للـ Wabbits
وسط هادشي كامل وصلت تقريباً للمستوى 65–70، وبديت نرجع نركّز كثر على جزيرة Wabbit وعلى Dofus Cawotte.
وبصراحة، من بين المناطق اللي دزت منها، جزيرة Wabbit كانت من أكثر البلايص اللي عجبوني. الشكل ديال الأرانب تايضحكو وكيوت، الجو مختلف، وحتى الـ Quêtes عندهم واحد الطابع خاص.
ودابا كنت أقوى بزاف من أول مرة وصلت ليها.
درت دونجونات كثار، صايبت Gelano بيدّي، تعلّمت نستعمل Lumino مزيان، وحتى Feu Prophétique اللي جعّرني رجعت ليه وفرشختو. قلت مع راسي:وليت وااااعر دابا شنو يقدر يوقّفني؟
…
وصلت لواحد الـ puzzle… قلّبت كيفاش كيدوز…
والجواب كان بسيط: خاص ثلاثة ديال اللعّابة.
أنا بوحدي. و Lumino مامحسوبش.
وباقي خاصني… جوج بنادم 😱.
وفجأة، المشكل ما بقاش فالمستوى ولا فالمعدات ولا فالـ strategy.
كنت تعلّمت ندبّر راسي بوحدي وسط serveur multi-compte…
ولكن هاد المرة خاصني فعلاً ناس خرين. أوووو ماااي گاااد!!
يتبع.
