ﺗﺤﻴﺔ ﻧﺎﺿﻴﺔ ﻣﻦ ﻋﻨﺪ ﺑﻮﻋّﻮ!
هاد المرة خدمت شوية على الـInventory والـEquipment ديال اللعبة.
كنت باغي اللاعب يقدر يجمع الحوايج اللي كيلقا فالعالم، يشوف المعلومات ديالهم ويلبس الأسلحة ويتْحَزَّم.
الشكارة (أو المحفظة) والأغراض
بديت بصناعة واجهة ديال الأغراض بسيطة فيها مجموعة ديال الخانات باش نخزّن فيها الحوايج.
وزدت ليها واحد الـPanel كيبيّن المعلومات ديال الحاجة اللي كنختار، بحال السّمية، الوَصف والضرر ديال السلاح.
مثلاً، عندي دابا هاد سيف هادا:
كيعطي 5 فالضرر. سيف ديال المبتدئين, ولكن قاضي الغرض. 😂
وحاولت حتى نخلي الواجهة بالدارجة، بحال الشكارة، معلومات، الضرر… وباقي شوية ديال الكلمات اللي خاصني نترجم.
التجهيزات والـPaper Doll
من بعد دوزت للـEquipment، وبغيت ملي نلبس شي حاجة تبان حتى على الشخصية، ماشي غير تزيد فالـStats.
استعملت واحد الـSubViewport باش نعرض الشخصية 3D وسط الواجهة، وزدت حتى معلومات Stats بحال الصحة، الهجوم، الدفاع والسرعة.
دابا ملي كنلبس سيف ولا Armor، كيبان على الشخصية فالواجهة وحتى فالعالم ديال اللعبة، والـStats كتتبدل على حساب التجهيزات.
ومني تلبّْسو تقدر تشوف نيشان فالواجهة:
بالنسبة للـArmor، مازال كنستعمل بلوكات مؤقتة مكتوب عليهم طربوش، كسوة، صباط… حتى نصاوب ليهم موديلات مزيانة.
الصنادق والـLoot
وزدت حتى الصندوق اللي يقدر اللاعب يتفاعل معاه ويفتحو.
دابا نقدر نحط شي سيف ولا شي غرض فالصندوق، ومنين اللاعب كيفتحو، كيخرج منو ويقدر يجمعو.
وزدت حتى الدراهم، والعدد ديالهم كيبان الفوق فواجهة الشكارة.
دابا اللاعب يقدر يجمع شوية ديال الـLoot وماشي غير الأسلحة والتجهيزات.
مازال ما كاين لا متجر لا اقتصاد، ولكن على الأقل ولات عندي العملة فاللعبة. 😂
شنو من بعد؟
هادو هما الحوايج اللي خدمت عليهم هاد المرة. باقي خاصني نزيد أنواع أخرى ديال الـItems، ونحسّن التجهيزات والواجهة.
ولكن دابا على الأقل نقدر نلقى سيف، نجمعو فالشكارة، نشوف المعلومات ديالو ونلبسو على الشخصية.
نشوفكم فالـDevlog الجاي إن شاء الله!
تهلاو!
Bou33ou
