ﻭﺍﺵ ﻭﺍﺟﺪﻳﻦ ﻟﻤﻐﺎﻣﺮﺓ ﺟﺪﻳﺪﺓ؟
فالمقال اللي فات، كملت تقريباً كلشي اللي قدرت ندير فـ Astrub، خديت أوّل Dofus (ديال بلعاني) اللّي هو Dofus Argenté، وجا الوقت باش نشوف شنو كاين برّا المناطق اللّي فابور.
شنو درت… جرّبت الاشتراك ديال شهر.
أول اشتراك
لقيت Starter Pack بحوالي 35 درهم، وفيه شهر ديال الاشتراك وبعض الحوايج الإضافية. قلت نجربو ونشوف واش اللعبة غادي تبقى شاداني حتى من بعد Astrub.
هاد العرض كيتشرى غير مرة وحدة لكل حساب، يعني بحال واحد Pack ديال البدية قبل الاشتراكات العادية.
ومعاه حصلت حتى على Lumino، أول Compagnon عندي. وبما أنني كنلعب غالباً بوحدي، لقيتو مفيد بزاف فبعض القتالات والدونجونات.
العالم ولّى كبير بزاف
أول حاجة درتها ما كانتش شي مهمة محددة، بديت غير كندور 😂. مشيت لـ Amakna، ومن بعد وصلت حتى لـ Sufokia، وبديت نكتاشف حتى بلايص بعاد بحال Bonta وBrâkmar. وكل مرة كنت كنقول: «نمشي غير نشوف هاد البلاصة»، كنلقى راسي دخلت فمهمة جديدة ولا لقيت دونجون ولا شي حاجة أخرى كتشدني.
بصراحة، ضعت شوية، ولكن كان ضياع زوين. فـ Astrub تقريباً كنت عارف شنو خاصني ندير، ولكن منين خرجت من Astrub، المشكل ما بقاش هو شنو ندير… ولى هو: شنو ندير اللّول؟
التنقل ريّحني بزاف
مع هاد الجري كامل، بديت نستعمل بوَّابات الـ Zaaps أكثر، ولكن الحاجة اللي عجباتني أكثر هي travel/. كنحدد بيها الإحداثيات اللي باغي نوصل ليها، ونخلي Law-V تشد الطريق بوحدها.
يمكن تبان حاجة صغيرة، ولكن فعالم كبير بحال هادا ريحاتني بزاف من أنني نبقى نبرك Map بـ Map. وزيد عليها، مرات كنت غير كنخلي Law-V ماشية ونتفرج فالمناطق اللي كتدوز منها.
بغيت ندير كلشي 😂
منين تحل العالم قدامي، وليت باغي نكمل كلشي: مهام، Donjons، Succès وChallenges. حتى الـ Attitudes شدّوني، حيث كاينين حركات كتلقاهم وتتعلمهم وسط العالم. بديت نجمع منهم شوية بحال البوسة، الجوع، والعزف على الگيتار، وولات حتى هادي حاجة أخرى كنقلب عليها وأنا كندور.
كل مرة نمشي على قبل حاجة وحدة، كنلقى راسي زدت جوج ولا ثلاثة ديال الأهداف جداد 😂.
بدات رحلة البحث على الـ Dofus
من بين المهام اللي بديت نتبع كانت بعض الـ Quêtes mondiales بحال Le réceptacle des Dofus، وهنا بدات الرحلة كتقرب أكثر للهدف اللي رجعت للعبة على قبلو: نقلب على الـ Dofus ونجمعهم.
هاد المهام بدات كتديني لمناطق جديدة، وولات عندي لأول مرة واحد الخيط واضح نتبعو فهاد المغامرة.
وكان كلشي غادي مزيان…
حتى وصلت لـ Feu Prophétique
أول حيط: Feu Prophétique
هاد العافية حبّساتني ديال بصّح. تقاتلت معاها شحال من مرة، وكل مرة كنت كنخسر. فالأول ما بانش ليا غير صعيب، بان ليا مستحيل بالمستوى والمعدات اللي كانو عندي.
أول حيط حقيقي لقيت قدامي.
يمكن أنا ما فهمتش الميكانيك مزيان، حيت القتال ما كانش عادي. كانت ديك العافية ومعاها ستة ديال العوافي الصغار، وإلا قاستك شي وحدة فيهم كتموت فالبلاصة، وزيد عليها كل دور كينقص ليك تقريباً 100 من الدم. داكشي كان معقد شوية، ويمكن أصلاً خاصك تلقى شي ستراتيجية معينة باش تربح.
ولكن بالنسبة ليا فداك الوقت، القتال ما عطانيش رسالة واضحة بحال: «خاصني نتعلم ونعاود نحاول.» بالعكس، الرسالة اللي وصلاتني كانت: «راه ما يمكنش ندوز من هنا.»
وكنظن هاد النوع ديال الحواجز يقدر يكون محبط شوية، خصوصاً لشي واحد باغي يكمل المهام بالترتيب، حيث يقدر يظن أنه تحبس وما بقا عندو ما يدير.
أنا درت الحل الأسهل…
خليتو ومشيت 😂.
ماشي مشكل آ Feu Prophétique… نرجع ليك من بعد.
مشيت نكبر شوية
من بعد ما خليت داك القتال، رجعت نكمل مهام خرين، ندخل Donjons، ندير Succès ونكتاشف العالم. ومع هادشي كامل، المستوى ديالي بدا كيطلع بوحدو. وهاد الطريقة فالتقدم عجباتني فـ DOFUS: ماشي ضروري تبقى غير كاتطحن فالوحوش باش تطلع المستوى، كتكون غادي ورا شي هدف والـ XP كاتجي مع الرحلة.
ومع ما طلعت فالمستوى، حتى لبسة SpongeBob اللي فرحت بها فالمقال اللي فات ما بقاتش كافية، وبشوية بشوية بديت نبدل المعدات ديالي.
SpongeBob تقاعد… 😂.
وفنفس الفترة، تزاد حتى Piou Bleu للمغامرة ديال Law-V، من بعد ما خديتو فواحد المهمة.
غير هو ماخاصّوش يعرف كنت لابس عشرانو قبل😂.
وصلت تقريباً للمستوى 45
وسط هادشي كامل، وصلت تقريباً للمستوى 45. ولكن بدل ما يكون هادشي نهاية شي مرحلة كبيرة، بان ليا أنني باقي حتى ما بديت.
فالمقال اللول كنت باقي فـ Incarnam، وفالثاني وصلت لـ Astrub وخديت Dofus مزور. ودابا العالم كامل بدا يتحَل قدامي: كاينين مناطق مازال ما شفتهمش، دونجونات ما دخلتهمش، ومهام كثار باقيين كيتسناوني.
وزيد عليها… كاين واحد Feu Prophétique باقي عندي معاه الحساب 😂.
فالمرحلة الجاية… خاصني نولي أقوى.
تهلاو!
