ﻣﺮﺣﺒﺎً ﺑﺎﻟﻨﺎﺱ ﺍﻟﻌﺰﺍﺯ!
إلا بغيتي تلعب Minecraft مع صحابك بلا ما تخلص على Hosting، تقدر تستعمل Aternos باش تصاوب سيرفر مجاني.
فهاد الدليل غادي نشوفو الطريقة من إنشاء الحساب حتى الدخول للسيرفر.
1. صاوب حساب فـAternos
دخل للموقع الرسمي ديال Aternos وصاوب حساب جديد.
اختار Username وPassword، ومن بعد دخل للحساب ديالك.
2. صاوب السيرفر
من Dashboard اختار: Create a server
من بعد اختار النسخة اللي كتستعمل:
- Java Edition إلا كنت كتلعب Minecraft Java على PC.
- Bedrock Edition إلا كنت كتلعب Bedrock.
تأكد أنك وصحابك كتستعملو نفس الـEdition.
إلا كنت كتستعمل نسخة مكراكيا
إلا كنت نتا أو شي واحد من صحابك كيلعب بـنسخة Cracked من Minecraft Java، خاصك تمشي لإعدادات السيرفر فـAternos وتفعّل اختيار Cracked.
هاد الاختيار كيخلي السيرفر يقبل لاعبين بلا التحقق العادي من حساب Minecraft.
إلا خليتي Cracked مطفي (OFF)، غير الناس اللي عندهم نسخة أصلية وحساب Minecraft صالح هما اللي غايقدرو يدخلو.
3. اختار نسخة Minecraft
دخل لإعدادات السيرفر واختار نفس نسخة Minecraft اللي غادي تلعبو بها.
مثلاً، إلا كنتو كاملين على 1.21، خليه حتى هو على نفس النسخة.
هاد الخطوة مهمة باش ما يوقعوش مشاكل فالدخول للسيرفر.
4. خدّم السيرفر
رجع للصفحة الرئيسية ديال السيرفر وبرك على: Start
أول مرة يقدر يطلب منك توافق على الـEULA.
من بعد تسنى حتى حالة السيرفر تولي Online.
Aternos يقدر يوقف السيرفر منين ما يبقى حتى واحد كيلعب فيه، وتقدر ترجع تشغلو من الموقع ملي تحتاجو.
5. كيفاش يدخلوا صحابك للسيرفر؟
منين السيرفر يولي Online، غادي يعطيك العنوان ديالو فصفحة السيرفر.
إلا كنت كتستعمل Java Edition، غير نسخ Server Address وعطيه لصحابك باش يدخلو من Multiplayer.
وإلا كنت كتستعمل Bedrock Edition، Aternos غادي يعطيك Server Address ومعاه Port، وخصهم يدخلو بجوج فإعدادات السيرفر.
يعني ببساطة: شغل السيرفر، نسخ معلومات الاتصال من Aternos، وشاركها مع صحابك.
ملاحظات مهمة
- خاصكم كاملين تستعملو نسخة Minecraft متوافقة مع السيرفر.
- قبل ما تبدل نسخة السيرفر أو الـSoftware ديالو، دير Backup للعالم.
- حيث Aternos مجاني، الأداء يقدر يكون محدود إلا كانو لاعبين بزاف أو Plugins/Mods ثقيلة.
- إلا بغيتي تستعمل Mods أو Plugins، تأكد أنهم متوافقين مع نسخة السيرفر والـSoftware اللي مختار.
الخلاصة
باش تصاوب سيرفر Minecraft مجاني بـAternos:
صاوب حساب → صاوب السيرفر → اختار النسخة → شغلو → شارك العنوان مع صحابك.
وبهاد الطريقة تقدر تلعبو Multiplayer بلا ما تحتاج Hosting مدفوع.
تهلاو!
