ﻣﺮﺣﺒﺎ ﺑﻴﻚ، ﻧﻮﺭﺗﻴﻨﺎ!
من بعد سنوات ديال الانتظار والكلام على Hytale، جاتني الفرصة نجربها راسي ونشوف واش فعلاً عندها شي حاجة مختلفة، ولا غير لعبة أخرى مستوحاة من Minecraft.
ما دخلتش للتجربة بعقلية أنني خاصني نقارن كل تفصيل بـMinecraft. بغيت غير نكتاشف العالم، نجرّب القتال والتصنيع، ونشوف الإحساس العام ديال اللّعبة.
ومن الساعات اللّولة، بان ليا أن Hytale ماشي غير نسخة من Minecraft. كتشتارك معاها فعالم البلوكات والاستكشاف، ولكن عندها الجو ديالها فالشخصيات، الحركة، القتال وحتى شكل العالم.
البداية: الخروج للعالم
بديت التجربة من واحد المعبد، ومنين خرجت لقيت راسي فالعالم الرئيسي.
أول حاجة درتها كانت بسيطة: ضربت شجرة باش نجمع الخشب، ومن بعد صاوبت الأدوات والأسلحة اللّولة.
العالم كان حي أكثر من اللي كنت متوقع. لقيت أعداء وحيوانات مختلفة:
- هياكل عظمية كيتحركو ويهاجمو اللاعب.
- ذئاب كيقربو منك وكيقدرو يطاردوك.
- حيوانات مُسالمة كتعطي للعالم شوية ديال الحياة.
اللي عجبني هو أن الحركة والقتال ما كيبانوش بحال Minecraft. الشخصية عندها Animations أوضح، والضرب بالسلاح كيتحس أكثر بحال لعبة RPG حقيقية.
المغامرة داخل الكهوف
من بعد الاستكشاف فوق الأرض، دخلت لواحد الكهف باش نقلب على الموارد.
الكهوف كانوا من أكثر الحوايج اللي شدوني فالتجربة. الإضاءة، المساحات، والأعداء عطاو للبلاصة جو ديال Dungeon صغيرة، ماشي غير حفرة فيها المعادن.
لقيت أنواع مختلفة ديال المخلوقات:
- جرذان كيتحركو فالظلام.
- خفافيش ومخلوقات صغار كيبانو فجأة.
- Goblins كيهجمو على اللاعب وكيخليو الاستكشاف أخطر.
وكان خاصني نبقى كنراقب الطريق والموارد اللي عندي، حيث كلما هبطت كثر، كيزيدو الأعداء وكيخصك تكون مجهز حسن.
النحاس والتصنيع
جمعت النحاس باش نجرب نظام التصنيع.
باش نصاوب تجهيزات جديدة، استعملت أكثر من محطة:
- Furnace باش نذوب المعدن.
- Weapon Table باش نصاوب الأسلحة.
- Gear Table باش نصاوب الدروع والتجهيزات.
عجبني أن التصنيع ما كانش كامل داخل Menu وحدة. خاصك تدور بين محطات مختلفة، وهادشي كيعطي إحساس أنك فعلاً كتجهز راسك قبل المغامرة.
من بعد ما صايبت درع وسلاح حسن، رجعت للكهوف وأنا واجد كثر.
تخصيص الشخصية
من الحوايج اللي عجبوني حتى هما اختيارات تخصيص الشخصية.
تقدر تبدل الوجه، الشعر، اللباس والألوان، والشخصية كيبان عندها ستيل مختالف على شخصيات Minecraft.
وبما أن Hytale مركزة بزاف على التخصيص، جاتني مباشرة أفكار على حوايج مغربية يمكن تزيدها كــMods من بعد:
- طاجين كيعطي Health.
- راية مغربية داخل البناء.
- جلابة وطربوش للشخصية.
- ديكورات مستوحاة من المغرب.
هاد الحرية هي اللي تقدر تخلي كل Community تزيد الحوايج اللي كتعجبها.
واش Hytale تقدر تنافس Minecraft؟
من هاد التجربة القصيرة، ما نقدرش نقول أن Hytale غادي تعوض Minecraft أو تكون أحسن منها فكلشي.
Minecraft عندها سنوات طويلة من المحتوى، اللاعبين والمودات، وصعيب أي لعبة توصل لنفس المستوى دغيا.
ولكن Hytale عندها نقاط قوة واضحة:
- عالم بصري فيها تفاصيل كثر.
- شخصيات وحركات حسن.
- قتال قريب أكثر لألعاب الـRPG.
- كهوف واستكشاف فيهم تنوع.
- نظام تخصيص واسع.
اللي غادي يفرق بزاف هو شحال غادي تعطي للاعبين من الحرية باش يصاوبو Mods وServers والمحتوى ديالهم.
بالنسبة ليا، ما محتاجاش تكون “Minecraft Killer”. يكفي تكون لعبة عندها شخصيتها الخاصة وتخلي اللاعبين يبنيو فيها تجارب جديدة.
مشروع ترجمة Hytale للدارجة
واحد من الأسباب اللي خلاتني مهتم بالتجربة هو الترجمة.
من قبل خدمت على ترجمة Minecraft، وبغيت نشوف واش Hytale تقدر تكون مشروع آخر للدارجة المغربية.
جربت نترجم شوية ديال المصطلحات البسيطة:
- Crude Sword: سيف بدائي.
- Copper Shield: ترس ديال النحاس.
هادشي غير اختبار صغير باش نشوف كيفاش المصطلحات غادي تبان وسط الواجهة.
الهدف ماشي نترجم الكلمات حرفياً، ولكن نلقى تعابير مفهومة وطبيعية، وتخدم مزيان داخل اللعبة.
الخلاصة
التجربة كانت قصيرة، ولكن خرجت منها بانطباع مزيان.
Hytale ما حسّيتهاش غير Minecraft برسومات مختلفة. عندها جو ديال RPG، قتال أوضح، استكشاف منظم، وشخصيات عندها حياة أكثر.
واش غادي تنافس Minecraft؟ مازال بكري باش نحكم.
ولكن اللي شفت خلاني باغي نرجع نستكشف أكثر، وخصوصاً نشوف شنو يقدر المجتمع يصاوب بالمودات والسيرفرات.
وبالنسبة للترجمة، الفكرة باقية عندي. منين تكون الأدوات والمحتوى واضحين أكثر، نقدر نشوف واش مشروع Hytale بالدارجة يستاهل نكمل فيه.
تهلاو!
