ﻭﺍﺵ ﻭﺍﺟﺪﻳﻦ ﻟﻤﻐﺎﻣﺮﺓ ﺟﺪﻳﺪﺓ؟
فـ المقال اللول عاودت كيفاش رجعت لـ DOFUS من بعد سنين طويلة، واخترت نلعب بشوية وعلى راحتي، بلا سباق وبلا زربة.
هاد المرة، كملت الرحلة أكثر… وصراحة، اللعبة فاجأتني بزاف.
من Incarnam نحو Astrub
ما كنتش مزروب، وبقيت كنكمل المهام وحدة بوحدة. من بعد ما ساليت Incarnam، شدّيت الطريق لـ Astrub.
ومع الوقت، لقيت راسي ساليت تقريباً كلشي لي كاين فيهم بجوج.
ديما كاين شي حاجة نديرها
فالعادة، الألعاب كنفضل نلعبهم بالإنجليزية، ولكن مع DOFUS اخترت الفرنسية. فالآخر هي لعبة فرنسية، وأغلب المجتمع والـ Guides والـ Wiki بالفرنسية، وهادشي كيخلي البحث على أي حاجة أسهل.
أكثر حاجة عجباتني هي أن اللعبة ديما كتعطيك هدف. مرة مهمة، مرة Succès، مرة دونجون، ومرة مهنة خاصك تطورها.
عمري حسيت براسي كنقول: «ودابا شنو خاصني ندير؟»
جربت أول الدونجونات، وحتى الـ Challenges اللي كيبدلو طريقة القتال. شي مرات ربحت، وشي مرات مت، ولكن مع كل محاولة كنت كنفهم اللعبة أكثر.
المحتوى المجاني فاجأني
ومن بين أكبر المفاجآت بالنسبة ليا، أن DOFUS تبدلات بزاف على اللي كنت عاقل عليها.
فـ 2007 كنت كنظن أن المحتوى المجاني كيسالي دغيا، ولكن دابا كملت Incarnam وAstrub، ووصلت حتى لـ Tainela وحتى منطقة ديال البحر شمال شرق Astrub، وهادشي كامل بلا ما نحتاج نشتارك.
هادشي فاجأني صراحة، خلاني نحس أنّ اللعبة ولات كتخلي اللاعبين الجداد يعيشو تجربة طوَل قبل ما يفكرو يشتركو.
الهدف الجديد: لبسة SpongeBob
من بعد اكتاشفت كاينة لبسة جديدة حسن من ديال الـ Piou اللي عندي… لبسة SpongeBob.
أول ما شفتها، قلت مع راسي: خاصني نلبس هادي.
بقيت كنعاود Donjon Ensablé شحال من مرة، وحتى الوحوش ديال المنطقة كنت كنقاتلهم بزاف.
حتى بديت كنطيَّح قطع اللبسة وحدة بوحدة، لقيت راسي جمعتها كاملة.
من بعد بزااااف ديال المحاولات، أخيراً جمعت Panoplie en mousse، أو كما سمّيتها أنا: لبسة SpongeBob.
وصلت تقريباً للمستوى 30 وأنا كنستعملها، وحسيت بالفرق مقارنة مع لبسة Piou.
ماشي غير الأرقام لي تبدلو، حتى الإحساس بالتقدم ولّى واضح.
المهام دخلاتني لعالم المهن
حتى المهن لقيت راسي محتاج ليهم.
وحدة من المهام كانت خاصها Planche en Châtaignier، وهادشي كيطلب مستوى 20 فـمهنة Bûcheron.
وبحكم أن الحساب المجاني عندو قيود، ما قدرتش نحل المشكل غير بالشرا.
الحل الوحيد كان هو نطلّع مهنة الـBûcheron بوحدي حتى قدرت نصنع اللي خاصني.
ومن بعد بديت نجرب حتى مهنة Bijoutier.
علاااش؟ تفكرت خاتم سميتو Gelano. كنت باقي عاقل أنو كان ديما غالي، وقلت يمكن هاد المرة نصنعو رّاسي بلا ما نشريه.
واش نقدر نديرها؟ هادي قصة أخرى 🤔.
أول بيضة تنين
ومن بعد ساعات وساعات ديال اللعب، حصلت أخيراً على أول Dofus Argenté.
صراحة، كان عندها واحد الإحساس خاص.
من نهار كنت صغير وأنا كنسمع على الدافوس، بيضات التنين، ودابا أخيراً أول وحدة ولات عندي… واخا تكون غير ديال بلعاني. 😂
حسيت بحال إلى واحد الحلم الصغير ديال 2007 تحقق أخيراً.
شنو تعلمت كمطوّر ألعاب؟
بحكم أنني كنخدم على اللعبة ديالي، كنت كنراقب DOFUS كيفاش مصاوبة.
عجبني كيفاش اللعبة كتربط المهام، والمهن، والدونجونات، والمعدات. مهمة وحدة تقدر تدخلك لعالم كامل، وديما كاين سبب يخليك تكمل شوية بشوية.
حتى التقدم عجبني. ماشي تبقى غير كاتطحن فالوحوش باش تطلع المستوى، ولكن ديما كاين هدف واضح كيوجهك، وهادشي خلا كل إنجاز نحس بقيمتو.
هاد النوع ديال التصميم خلاني نفكر بزاف فالأفكار اللي بغيت نطبق فاللعبة ديالي.
الخطوة الجاية: الاشتراك؟
الرحلة مازال طويلة.
ولكن إذا كان المقال الأول هو بداية الرجوع، فهاد المرحلة خلاتني نقتنع أن DOFUS ما بقاتش هي اللعبة اللي كنت عاقل عليها قبل قرابة عشرين عام.
والمحتوى المجاني خلاني نكتاشف بزاف ديال الحوايج، ولكن دابا بديت كنحس أن الوقت قرّب باش نشترك، ونشوف شنو كاين خارج Astrub والمناطق المجانية.
ما غاديش نزرب، ولكن غالباً الاشتراك غادي يكون الخطوة الجاية فهاد الرحلة.
وتايبان ليا… مازال فيها بزاف ديال الحوايج اللي خاصني نكتاشفها.
